راس القدو

سوالف راس القدو: الله يحفظ الشيخ.. ويستر علينا

 

البحرين اليوم – (راس القدو)

ويش الواحد يسوّي ويقول… الحالة كسيفة يا بويي، والوضع كأنه رايح في النازل مدام الشيخ – الله يطول في عمره – طالع بره الديرة بهذي الطريقة الحزينة..

أنا قلت لأم علاوي من أول ما شفت الأقرع ويه ربعه وهم يطبلون: “أكيد الموضوع فيه  إنّ”. بس مشكلتنا إحنا البحارنة طيبين زيادة على اللزوم، ولولا زعل أم علاوي الستراوية، جان قلت ليها “كلّه منكم، من يوم رفعتون رامبو بسيارته في سترة وهو صاير كلّه يمبي يرفعونه ويركب فوق، ولو على حماره”. ما في أحد مو خايف على صحة الشيخ، وأولادنا هم اللي كانوا في المقدّمة وقدموا روحهم وخسروا كل شي عشان يسلم الشيخ ويبقى تاج على الرووس.. فمعروف يعني منهو اللّي يحب الشيخ بالفعل ومنهو اللي أثبت قول وفعل لبْس الأكفان.. فما يحتاج أحد يطلع فيها ويقعد يواصل لهرار عن الفداء والشهادة وهو وربعه كانوا منخمدين ويه نسوانهم وقاعدين مستانسين في الفلل والمجمعات السكنية اللي جنها قصور.. واللّي سعر الرخام والبانيو مال حماماتها يبني ليي بيت من طابقين، بدل الخرابة هذي اللي ساكن فيها…

أنا اللي مو قادر أفهمه هو اشلون يبون الناس يطمّن قلبها على الشيخ وهو بسافر بجواز أبو سنة.. واللّي سقّط جنسيته وكان يضغط عليه عشان يطلع بره الديرة هو نفسه اللي “بيتكرم” وبيعالجه على حسابه!! اشلون أنا أمبي أفهم هذي بس… والله العظيم صاير ليي ساعتين وأنا أضرب على راس هالقدو عشان أفهم معناة إن الشيخ اللي ما خاف ولا انهزم ولا هزّه شي عشان يظل يحافظ على رايه وحريته ودينه وكرامته… اشلون آخرتها يطلع يسافر بفلوس واحد سوّه اللي ما سوّاه ولد الحرام في الناس؟؟!! اشلون يا ربي اشلون!!

وقبل لا أطفي هالقدو.. أمبي واحد يفهّم هالراس الشايب شي بعد.. أحين سفر الشيخ الله يحفظه ويشافيه بيكون نهاية الأزمة وخلاص يعني؟.. لو راح نبدأ ندخل في سالفة “الناس في زلزلة والعروس تمبي رجل”.. اللي عيونه يصلي الجمعة مكان الشيخ.. واللي يلاحق روحه عشان يدخل الزحرمان.. وناس تبمي اتّابع كأس العالم بلا وجع راس وسوالف الشيخ المظلوم؟؟ ما أقول إلا الله يستر علينا وعليكم.. تراها حالة كسيفة ويّه جماعة البرانيص والصكوك..

مقالات ذات صلة

زر الذهاب إلى الأعلى