سوالف راس القدو: الله يسمْ قلبك يا الزعطوط ولد الشّلاخ

البحرين اليوم – (راس القدو)

في أحقر وأكفر وأكشر من هذا الجاهل أبو الفشخره؟! في واحد يقدر يتحمّل شلاّخ ولد شلاّخ مثل الملعون حمد وولده أبو الفتايا؟!!

البنت فطّوم راوتني في تلفونها الشّلخ اللّي طالع اليوم عن نصّور المعجزة.. صدْق يعني واحد حقير! قلّة الحيا كلِّش في النّازل ويّه هالسافل.. لعنة الله على اللّي علّمك الشّلخ والحقارة…

يعني غصب يفوز ويطلع نمبر ون.. اشلون هذا؟ قاعد في أي كوكب هالزعطوط؟ لا.. والطّبالة مو موقفين.. كل واحد مطلّع بيان وتصريحات يباركون للبصل نصّور.. يعني رمى الشّلخة عيني عينك.. وصدّقوها، وقاموا يتلايموا عليها مفل الدّبان وضرْب تبريكات وتهاني! فعلاً ديرة داعسين عليها حرامية وزعاطيط…

أنا طول عمري اللّي بوصّل الستين.. ما مرْ عليَّ طِنْز واستهتار مثل هذا.. واحد توّه متعلّم يروح الحمام بروحه؛ غصبْ زوْر يمبون يسوونه بطل العالم في كل شي.. يا ولد الساقطين خلّك زين ويه النّاس، وعدّل وضعك داخل البلد، ونظّف الوسخ اللّي يتقطّر من إيدك ورجولك ومن ما أدري وين.. وبعدين تعال اطّعبز علينا.. وراح انسوي روحنا مصدقينك بعد! بسْ إنّك اتّسوي كل الجرايم، اتبوق، واتّعذّب، واتشلّخ في الرايح والجاي.. وتمبي نصدّقك بعد! لعنة الله على لقْماط اللّي شالك يوم جابتك أمّك!!

سامحوني.. أنا اليوم طافح حدّي من الهمّ.. علاّوي مريض وصايدنه الجرب في السّجن ومو راضين يدخلون الدّوه اللّي طرشناه ليه، وأمّه صار ليها أسبوع طايحه في السرير وقاعدة تحاتي الولد.. وفوق هذا صاير ليي يومين أدوّر على تتن زين مو محصّل، كلّه غالي، وقاعد أنفخ قدو تتن ماله مرطّب حدّه.. وكأني قاعد أشرب سمْ، الله يسمْ قلبك يا ناصر يا ولد الحرامية…