راس القدو

سوالف راس القدو: المؤبد.. وجماعة الغرشة

 

البحرين اليوم – (راس القدو)

أنا مو سياسي، ولا أفهم شي فيها، وما أذكر إني دخلت في السياسة قبل 2011.. وحتى لمّه قبّت يوم الاثنين ما دخّلت روحي لا يمين ولا يسار.. وما رحت الدوار أصلاً إلا مرة أو مرتين.. وكان علاوي واخته هم اللي جرّوني جرْ هناك ويّه أمهم. يعني تقدرون اتقولون إني غشيم في السياسة ولله الحمد…

بس.. أنا مستغرب من الجماعة اللّي انزهقت لمّه حكموا على شيخ علي سلمان بالمؤبد.. ومستغرب أزيد وأزيد من اللّي ما انزهق لمّه حكموه أول شي بالبراءة. ناس على حساب سياسيين وفاهمين طول وعرض، بس حَبسوا روحهم في الغرشة اللّي جرجرتهم إليها الحكومة وهم ما يدرون.. وظلّوا يلفّون داخلها، ليل نهار، ليْن ما ظنّوا إنهم برّه الغرشة. يعني يا جماعة، اضْربوا بريْك شوي، لا تنسون بأن البلد كلها صايره سجن، والحكومة شادْخه الأوّلي والتالي صار ليها سنوات، وهي مو مستعدة اطّلع شيخ علي من السجن “إكرامية” أو “يا الله من مال الله”..

أي واحد بسيط على قدّي بيعرف من البداية إنّ الحكومة ماخذه قضية شيخ علي “لعبة أتاري” لا أكثر ولا أقل.. وما راح اتوقّف اللعبة هذي إلا لمّه تنقطع الكهربه أو يخلص البتري. الكهربه تنقطع لمّه يجي أمر من “البيت العود”، والبتري يخلّص لمّه ملك لْهرار يفْنكش.. وبدون هذا أو هذا شيخ علي راح يظل في السجن..

ها.. ويش رايكم في القدو.. يعلّم الواحد لو لاه!؟

مقالات ذات صلة

زر الذهاب إلى الأعلى